标签 亚运 下的所有文章

It's done. Game's over.

亚残闭幕式开完,亦就即系话,成个亚运全部搞掂嗮。真系个好消息,秩序卒之可以恢复正常。不过坏消息系,广州再次变成乌烟瘴气嘅大工地。香港政府想办亚运会,我嘅个人睇法系,咪搞,啲苏州屎烦都烦死你。虽然香港无咁严重。

网络上曾经有个好恶毒嘅传言,话北京奥运之后电视大楼着火,上海世博之后居民楼火烛,广州聼完压力好大。个人直觉,应该无咁简单。喺我记忆当中,中石化有一个炼油厰好中意起火,今年曾经有成个月连续N次着火,唔通今铺又想整多镬兼且烧通顶?希望唔好畀我估中……

亚残运开幕

亚残运会开幕式结束,虽然就无亚运开幕式咁精彩,不过畀面支持下残疾人,开幕式都叫做合格啦。开幕式之后,7日嘅亚残运就要开始,从另一个意义讲,亚运会将于7日后完全结束。

等咗咁耐,总算“重见天日”。千祈无好再申请举办咩“盛会”,今次亚运已经系劳民伤财,“使钱”变“洗钱”,“整色整水”工程、豪华型暗哑路灯更换工程、正常路面重铺工程、古建筑翻新工程,洗钱如流水,亿亿声噉洗,快过将啲钱掉落咸水海。上一排有人话过想举办世博,后来无咗下文,听讲可能就噉“算数”唔搞。对我哋莅讲认真系个好消息。

亚残运一结束,广州全城即将恢复正常,不过空气质素可能又再变差。无所谓啦,起码啲景观装饰灯唔会再“光污染”我间房,瞓觉都舒服啲。

广州亚运卒之搞掂嗮

夜晚睇咗广州亚运闭幕式,我心入边谂:好啊,起码唔使烦喇!亚运虽然带来咗清新嘅空气、相对顺畅嘅马路,但其实又带来咗一大抽苏州屎,例如“整色整水”工程、一年几全市变成个大工地。据闻有人仲想举办世博、奥运,我心谂:咪搞!

讲到今次亚运,点都要提提开幕式同闭幕式。其实今次开幕式同闭幕式的确很好,开幕式以水为主题、闭幕式以歌为主题,都令人印象深刻,起码两次都有用到粤语。闭幕式做得几好,喺打压双语并存、强推Mandarin嘅环境之下能够用粤语唱咁长时间,真系好难得。好可惜,我哋嘅《月光光》点解要用Mandarin来唱呢?我觉得唱得好难聼,虽然歌词系改咗。

提到开幕式同闭幕式,仲要提埋𠮶个“国家级‘监控偷窥闭路电视台’”(即系“央视”,下文简称“偷睇电视台”)。唔知系导播嘅水平太差定系摄像机嘅位置唔好,个镜头唔系太远就系太近,角度亦不够多,开幕式、闭幕式都系噉。调返转睇下,平时亚运体育赛事嘅镜头切换、位置、距离、角度反而做得几好。如果话体育赛事同文艺表演不同,噉广州电视台后来播放咗一个广州话版嘅亚运闭幕式,镜头同“偷睇电视台”好多都唔同,兼且镜头位置、距离、角度都拍摄得好过“偷睇电视台”。上次奥运开幕式同闭幕式𠮶阵时,“偷睇电视台”已经畀人閙过N次,今次亚运居然仲唔吸取教训,无鬼用。

讲到开幕式同闭幕式,又要提下烟花表演。开幕式结束𠮶阵时,现场宣布开幕式结束,本来跟着就有连续20分钟嘅烟花表演,点知“偷睇电视台”唔再转播,令我祗能够喺屋企阳台望着会场𠮶边烟花嘅一啲啲火花,然后听到一阵狂响,真系无奈。到咗闭幕式嘅时候本来以为“偷睇电视台”会吸取教训,继续转播埋落去,点知佢一样唔理,现场宣布闭幕式结束,跟着就唔再转播,令到后边嘅5分钟烟花表演又再无得睇,又再祗能够喺阳台睇下零星少少烟花,然后聼著一片狂响。

除咗呢啲,喺开幕式里边我仲有好多好多觉得唔多妥嘅地方,特别系开幕式𠮶阵时我哋嘅市长竟然畀乱出风头嘅人顶替,好彩最后闭幕式因为礼节需要,市长卒之都出现咗。加埋“偷睇电视台”嘅种种粗劣拍摄,我当时真系好想成个亚运开幕式闭幕式嘅Mandarin语音部份全部用粤语算数。广州举办亚运仲要畀“偷睇电视台”抢走摄影转播权,直头系无谱。