廣州亞運卒之搞掂嗮

夜晚睇咗廣州亞運閉幕式,我心入邊諗:好啊,起碼唔使煩喇!亞運雖然帶來咗清新嘅空氣、相對順暢嘅馬路,但其實又帶來咗一大抽蘇州屎,例如「整色整水」工程、一年幾全市變成個大工地。據聞有人仲想舉辦世博、奧運,我心諗:咪搞!

講到今次亞運,點都要提提開幕式同閉幕式。其實今次開幕式同閉幕式的確很好,開幕式以水爲主題、閉幕式以歌爲主題,都令人印象深刻,起碼兩次都有用到粵語。閉幕式做得幾好,喺打壓雙語並存、強推Mandarin嘅環境之下能夠用粵語唱咁長時間,真係好難得。好可惜,我哋嘅《月光光》點解要用Mandarin來唱呢?我覺得唱得好難聼,雖然歌詞係改咗。

提到開幕式同閉幕式,仲要提埋嗰個「國家級『監控偷窺閉路電視臺』」(即係「央視」,下文簡稱「偷睇電視臺」)。唔知係導播嘅水平太差定係攝像機嘅位置唔好,個鏡頭唔係太遠就係太近,角度亦不夠多,開幕式、閉幕式都係噉。調返轉睇下,平時亞運體育賽事嘅鏡頭切換、位置、距離、角度反而做得幾好。如果話體育賽事同文藝表演不同,噉廣州電視臺後來播放咗一個廣州話版嘅亞運閉幕式,鏡頭同「偷睇電視臺」好多都唔同,兼且鏡頭位置、距離、角度都拍攝得好過「偷睇電視臺」。上次奧運開幕式同閉幕式嗰陣時,「偷睇電視臺」已經畀人閙過N次,今次亞運居然仲唔吸取教訓,無鬼用。

講到開幕式同閉幕式,又要提下煙花表演。開幕式結束嗰陣時,現場宣佈開幕式結束,本來跟着就有連續20分鐘嘅煙花表演,點知「偷睇電視臺」唔再轉播,令我祗能夠喺屋企陽臺望着會場嗰邊煙花嘅一啲啲火花,然後聽到一陣狂響,真係無奈。到咗閉幕式嘅時候本來以爲「偷睇電視臺」會吸取教訓,繼續轉播埋落去,點知佢一樣唔理,現場宣佈閉幕式結束,跟着就唔再轉播,令到後邊嘅5分鐘煙花表演又再無得睇,又再祗能夠喺陽臺睇下零星少少煙花,然後聼著一片狂響。

除咗呢啲,喺開幕式裏邊我仲有好多好多覺得唔多妥嘅地方,特別係開幕式嗰陣時我哋嘅市長竟然畀亂出風頭嘅人頂替,好彩最後閉幕式因爲禮節需要,市長卒之都出現咗。加埋「偷睇電視臺」嘅種種粗劣拍攝,我當時真係好想成個亞運開幕式閉幕式嘅Mandarin語音部份全部用粵語算數。廣州舉辦亞運仲要畀「偷睇電視臺」搶走攝影轉播權,直頭係無譜。