Feb 032011
 

今次除夕春晚可謂豐富多彩,特別係廣東省。我喺廣州,可以睇到廣州電視臺、珠江電視臺、廣東衛視、南方臺TVS-2轉播江門慶典晚會、香港亞視本港臺港深晚會,以及CCTV與各地的聯歡晚會。

晚會太多,令人眼花繚亂,我惟有靠記憶逐一評論。

來講下廣視春晚先。廣視春晚有個特點:基本上係全新節目,新鮮拍攝新鮮播(唔排除有錄播節目,不過都算新鮮,原因等陣間再講)。廣州本土節目唔少,不過我個人好唔爽就係,國語内容太多,起碼珠江臺嘅國語内容多極都有限,少過廣州臺。個人感覺有兩個亮點:魔術表演同運情預測。運情預測應該係學往年香港迎春節目嘅做法,都做得唔錯,缺點係——火候唔夠,純粹係傾好意頭閑謁嘅節目時間。

然之後係TVS-2嘅轉播。TVS-2轉播咗江門慶典,請來嘅全部都係祖籍江門嘅名人。話時話,睇落其實都幾好嘅,不過睇耐咗就覺得悶喇。

香港亞視港深晚會其實都幾熱鬧下,連臺灣名人都請埋過來。不過就……作爲一個粵語活躍區,今次嘅國語内容反而多過廣州廣視春晚,失望。

廣東衛視嘅春晚都一樣請咗唔少名人,就連天王劉德華都來埋。不過成個春晚嘅國語内容比粵語内容多好多,睇見就煩。平時接觸國語都夠嗮多啦,再繼續轟炸就咪搞,所以我無點去睇。

我成晚主要就睇珠江電視臺嘅春晚,其實内容都幾豐富下,起碼有黃俊英、《外來媳婦本地郎》特別節目齊齊助陣,都幾有娛樂氣氛。可能唔少人都發覺《外來媳婦本地郎》最近幾年越做越弊,越來越長篇電視劇化,内容太過做作,做作得好明顯。今次娛樂氣氛都叫做勉強抵消啦。

講來講去,我個人覺得有兩個臺最有「特色」——花邊特色。

無論係廣州臺抑或珠江臺,肯定會見到一啲眼熟嘅演員,比如《都市笑口組》「柑桔」、「猩猩」,「柑桔」喺兩個臺嘅春晚同時出現(有一部份應該係錄播節目),都幾搏命做嘢噃。又比如陳堅雄先生,同「柑桔」一樣,同時喺兩個春晚亮相。

不過呢,珠江臺今次春晚有個最大嘅「賣點」係——明顯錄播多過直播,兼且好多都係以前嘅舊片,就連上一年春晚嘅節目都夠膽死同新鮮内容插埋一齊來播,欺騗觀眾。

無論係邊一個臺,似乎個個主播都咗臺玩埋一份,都幾過癮下。對比下南北春晚,好似CCTV春晚嘅小品多過唱歌,而廣東省内、香港各個春晚都係唱歌多過遊戲、小品等節目多多聲。講真嗰句,無論邊種我都覺得無咩心機去睇,我基本上睇到唱歌就轉台(除咗盧海潮唱扮成財神唱《財神到》嗰段我無轉),點知差唔多成晚個個春晚都唱緊歌,唔唱歌嘅春晚專播無聊兼語言統一嘅小品,轉台轉到人都煩(起碼好過長時間聼唱歌、睇小品)。

  One Response to “新年快樂!今次春晚「七國咁亂」”

  1. 除了吃飯多幾個菜,過年什麼都沒看,繼續電腦上網,一如往常。

Sorry, the comment form is closed at this time.