Apr 122011
 

今日我行喺條街度,無意中一位食煙嘅路人噴出嘅二手飄埋我度,好鬼攻鼻,令人作嘔!我真係點諗都唔明,點解會有咁多人食煙,而且越來越多!我查咗下同香煙有關嘅資料,一睇先知原來香煙變成大衆消費品衹有大約100年。

喺哥倫布發現美洲大陸之前,全世界除咗美洲印第安人之外無人知道咩叫食煙。當時歐洲人見到好多印第安人個個都喺燒着嘅煙草度吸緊一陣陣香味煙霧,有考古發現,印第安人嘅食煙歷史長達至少3500年。後來,香煙被人帶到歐洲。同鴉片一樣,香煙都有麻醉功效,亦有藥用價值,而且又有醒腦提神嘅功效,於是慢慢就廣泛傳播。不過就好可惜,同草唔同命,鴉片後來被嚴格限制使用,但香煙唔單止無限制,而且重變成大衆日用品,搞到全世界都烏煙瘴氣。

香煙有咩危害,好多人都知,但係啲煙民死都要食(所以咪就比其他人死得更加容易)。二手煙比一手煙危害更加大,而且會令其他唔食煙嘅人感覺唔舒服,好多人亦都知,但就偏偏有好多無品煙民喺辦公室、電梯、商店等等較爲封閉嘅地方猛咁食煙。香煙會令人上癮,而且又會嚴重危害健康,雖然煙癮唔至於勁過毒品,但係噉嘅上癮法真係同毒品無咩唔同。我見到好多煙民煙癮一發作就好辛苦,成日想揾煙食。而且啲煙民成身都係強烈嘅煙味,聞到都唔舒服。最衰嘅就係,煙草同商業有好深嘅關係,特別係做生意嘅人,喺商業談判、傾生意嘅時候成日都要相互敬煙,煙不離口、亦不離手,就連見到生保人都可能會互相敬煙。明知煙草有害都要敬過去,分明就係咒人快啲死啫,直頭就係敗壞風氣嘅陋習。有人會以煙草可以提神醒腦爲由辯護食煙嘅行爲,不過喺我嘅角度來睇就真係幾荒唐,想要提神醒腦可以飲茶飲咖啡,一樣都有功效,唔一定係都要食煙,所以「食煙提神醒腦」簡直就係藉口。

好多國家同地區嘅政府都推廣戒煙,甚至禁煙。好多國家都未實行全面禁煙,而係針對某一年齡段嘅人禁售香煙,兼且提高煙價鼓勵民衆戒煙。點知就有煙民猛鬧唔公平,話係衹准有錢人食煙、唔畀窮人食煙,應該要一視同仁直接全面禁煙,人人都無得食。我見到就真係覺得無厘頭,啲煙民明知食煙危害健康、二手煙危害他人健康,因爲煙癮難以戒除成日想食煙,又怕要捱貴價煙,所以就鬧唔公平。不過如果一旦未經任何過渡措施而直接禁煙,我估一定會有人抗議話,「點解連過渡措施都唔做就直接禁煙,戒煙都要時間,直接禁煙對煙民太過殘忍」。換另一個角度來講,其實就係「我就係要危害自己健康 ,我就係要慢性自殺,你理得我咁多做乜」——唔單止煙民,其實好多吸毒嘅人都係噉諗,不過下場唔同,吸毒嘅人會畀人拉去戒毒,但煙民唔會。煙民數量實在太多!可以講,香煙屬於合法嘅毒品。

香煙工業解決咗好多就業問題,又創造出好多經濟收入,但代價就係損害大量民衆嘅健康、加重公共醫療系統負擔,都唔知邊頭補邊頭。至於嗰啲鼓勵他人食煙嘅人,你嘅行爲同企圖殺人無咩唔同,衹不過你並無將人直接殺死,而係間接慢慢噉將人害死,手段殘忍!如果你本身就係煙民,你自己死就算啦,重想拖埋人哋落水同你陪葬,都算陰毒啦!

Sorry, the comment form is closed at this time.