It's done. Game's over.

 廣州, 粵語文章  Comments Off on It's done. Game's over.
Dec 202010
 

亞殘閉幕式開完,亦就即係話,成個亞運全部搞掂嗮。真係個好消息,秩序卒之可以恢復正常。不過壞消息係,廣州再次變成烏煙瘴氣嘅大工地。香港政府想辦亞運會,我嘅個人睇法係,咪搞,啲蘇州屎煩都煩死你。雖然香港無咁嚴重。

網絡上曾經有個好惡毒嘅傳言,話北京奧運之後電視大樓着火,上海世博之後居民樓火燭,廣州聼完壓力好大。個人直覺,應該無咁簡單。喺我記憶當中,中石化有一個煉油厰好中意起火,今年曾經有成個月連續N次着火,唔通今鋪又想整多鑊兼且燒通頂?希望唔好畀我估中……

亞殘運開幕

 廣州, 粵語文章  Comments Off on 亞殘運開幕
Dec 132010
 

亞殘運會開幕式結束,雖然就無亞運開幕式咁精彩,不過畀面支持下殘疾人,開幕式都叫做合格啦。開幕式之後,7日嘅亞殘運就要開始,從另一個意義講,亞運會將於7日後完全結束。

等咗咁耐,總算“重見天日”。千祈無好再申請舉辦咩“盛會”,今次亞運已經係勞民傷財,“使錢”變“洗錢”,“整色整水”工程、豪華型暗啞路燈更換工程、正常路面重鋪工程、古建築翻新工程,洗錢如流水,億億聲噉洗,快過將啲錢掉落咸水海。上一排有人話過想舉辦世博,後來無咗下文,聽講可能就噉“算數”唔搞。對我哋蒞講認真係個好消息。

亞殘運一結束,廣州全城即將恢復正常,不過空氣質素可能又再變差。無所謂啦,起碼啲景觀裝飾燈唔會再“光污染”我間房,瞓覺都舒服啲。

廣州亞運卒之搞掂嗮

 廣州, 粵語文章  Comments Off on 廣州亞運卒之搞掂嗮
Nov 282010
 

夜晚睇咗廣州亞運閉幕式,我心入邊諗:好啊,起碼唔使煩喇!亞運雖然帶來咗清新嘅空氣、相對順暢嘅馬路,但其實又帶來咗一大抽蘇州屎,例如“整色整水”工程、一年幾全市變成個大工地。據聞有人仲想舉辦世博、奧運,我心諗:咪搞!

講到今次亞運,點都要提提開幕式同閉幕式。其實今次開幕式同閉幕式的確很好,開幕式以水爲主題、閉幕式以歌爲主題,都令人印象深刻,起碼兩次都有用到粵語。閉幕式做得幾好,喺打壓雙語並存、強推Mandarin嘅環境之下能夠用粵語唱咁長時間,真係好難得。好可惜,我哋嘅《月光光》點解要用Mandarin來唱呢?我覺得唱得好難聼,雖然歌詞係改咗。

提到開幕式同閉幕式,仲要提埋嗰個“國家級‘監控偷窺閉路電視臺’”(即係“央視”,下文簡稱“偷睇電視臺”)。唔知係導播嘅水平太差定係攝像機嘅位置唔好,個鏡頭唔係太遠就係太近,角度亦不夠多,開幕式、閉幕式都係噉。調返轉睇下,平時亞運體育賽事嘅鏡頭切換、位置、距離、角度反而做得幾好。如果話體育賽事同文藝表演不同,噉廣州電視臺後來播放咗一個廣州話版嘅亞運閉幕式,鏡頭同“偷睇電視臺”好多都唔同,兼且鏡頭位置、距離、角度都拍攝得好過“偷睇電視臺”。上次奧運開幕式同閉幕式嗰陣時,“偷睇電視臺”已經畀人閙過N次,今次亞運居然仲唔吸取教訓,無鬼用。

講到開幕式同閉幕式,又要提下煙花表演。開幕式結束嗰陣時,現場宣佈開幕式結束,本來跟著就有連續20分鐘嘅煙花表演,點知“偷睇電視臺”唔再轉播,令我祗能夠喺屋企陽臺望著會場嗰邊煙花嘅一啲啲火花,然後聽到一陣狂響,真係無奈。到咗閉幕式嘅時候本來以爲“偷睇電視臺”會吸取教訓,繼續轉播埋落去,點知佢一樣唔理,現場宣佈閉幕式結束,跟著就唔再轉播,令到後邊嘅5分鐘煙花表演又再無得睇,又再祗能夠喺陽臺睇下零星少少煙花,然後聼著一片狂響。

除咗呢啲,喺開幕式裏邊我仲有好多好多覺得唔多妥嘅地方,特別係開幕式嗰陣時我哋嘅市長竟然畀亂出風頭嘅人頂替,好彩最後閉幕式因爲禮節需要,市長卒之都出現咗。加埋“偷睇電視臺”嘅種種粗劣拍攝,我當時真係好想成個亞運開幕式閉幕式嘅Mandarin語音部份全部用粵語算數。廣州舉辦亞運仲要畀“偷睇電視臺”搶走攝影轉播權,直頭係無譜。

轉載請註明: 轉載自https://www.still-c.com/
本文URL: https://www.still-c.com/archives/62.html