May 032011
 

今晚TVS-2嘅《今日最新聞》講咗有一條同落雨有關嘅新聞,本來好普通,毋需評論嘅。之但係就畀我見到一個鏡頭同一段話,搞到我真係無辦法忍住把口。係乜嘢咁令我忍唔住呢?咪就係依段囉:

 
新聞短時雷暴 突襲羊城,大概喺0:56,一位女士除鞋行路

新聞解説重話,依位女士就醒目啦,識得除鞋行路。我一睇就覺得好鬼好笑,落大雨除鞋行路係爲咗乜?有人話,落雨隻鞋濕得滯行起身唔舒服,所以先至要除鞋;亦都有人話,啲雨水入嗮鞋裏面,噏住噏住會風濕,所以要除鞋行路;更加有人話,隻鞋喺牌子嘢,濕咗之後可能會爛,成隻鞋廢嗮,又或者洗鞋麻煩,於是乎索性除鞋行路。

睇到啲噉嘅理由就真係令人覺得好滑稽。行喺條路度,唔怕一萬最怕萬一,如果一個唔好彩踩咗落玻璃碎度,又或者踩到啲釘,到時候醫返隻腳嘅湯藥費都唔少錢啦,兼且行動不便又要休養幾日,嘥錢嘥時間,就算隻腳唔痛荷包都痛啦。

呢嗱,都係同一條新聞,下邊依位女士就做得最啱啦:

 
新聞短時雷暴 突襲羊城,大概喺1:21,一位女士着住鞋行路

爲咗自己隻腳,着住鞋行路最穩陣。

Jan 102011
 

天氣預報講,最近幾日氣溫又會下降,可能降到6度。訡起前幾個星期凍到流鼻水,着多幾件衫都一樣凍,真係難頂。

睇來,始終都係赤道好,一年四季溫度都差唔多,海南島嘅人真係舒服。

因爲凍得滯,唔打咁多字啦,早唞~

It's done. Game's over.

 廣州, 粵語文章  Comments Off on It's done. Game's over.
Dec 202010
 

亞殘閉幕式開完,亦就即係話,成個亞運全部搞掂嗮。真係個好消息,秩序卒之可以恢復正常。不過壞消息係,廣州再次變成烏煙瘴氣嘅大工地。香港政府想辦亞運會,我嘅個人睇法係,咪搞,啲蘇州屎煩都煩死你。雖然香港無咁嚴重。

網絡上曾經有個好惡毒嘅傳言,話北京奧運之後電視大樓着火,上海世博之後居民樓火燭,廣州聼完壓力好大。個人直覺,應該無咁簡單。喺我記憶當中,中石化有一個煉油厰好中意起火,今年曾經有成個月連續N次着火,唔通今鋪又想整多鑊兼且燒通頂?希望唔好畀我估中……

亞殘運開幕

 廣州, 粵語文章  Comments Off on 亞殘運開幕
Dec 132010
 

亞殘運會開幕式結束,雖然就無亞運開幕式咁精彩,不過畀面支持下殘疾人,開幕式都叫做合格啦。開幕式之後,7日嘅亞殘運就要開始,從另一個意義講,亞運會將於7日後完全結束。

等咗咁耐,總算「重見天日」。千祈無好再申請舉辦咩「盛會」,今次亞運已經係勞民傷財,「使錢」變「洗錢」,「整色整水」工程、豪華型暗啞路燈更換工程、正常路面重鋪工程、古建築翻新工程,洗錢如流水,億億聲噉洗,快過將啲錢掉落鹹水海。上一排有人話過想舉辦世博,後來無咗下文,聽講可能就噉「算數」唔搞。對我哋蒞講認真係個好消息。

亞殘運一結束,廣州全城即將恢復正常,不過空氣質素可能又再變差。無所謂啦,起碼啲景觀裝飾燈唔會再「光污染」我間房,瞓覺都舒服啲。

廣州亞運卒之搞掂嗮

 廣州, 粵語文章  Comments Off on 廣州亞運卒之搞掂嗮
Nov 282010
 

夜晚睇咗廣州亞運閉幕式,我心入邊諗:好啊,起碼唔使煩喇!亞運雖然帶來咗清新嘅空氣、相對順暢嘅馬路,但其實又帶來咗一大抽蘇州屎,例如「整色整水」工程、一年幾全市變成個大工地。據聞有人仲想舉辦世博、奧運,我心諗:咪搞!

講到今次亞運,點都要提提開幕式同閉幕式。其實今次開幕式同閉幕式的確很好,開幕式以水爲主題、閉幕式以歌爲主題,都令人印象深刻,起碼兩次都有用到粵語。閉幕式做得幾好,喺打壓雙語並存、強推Mandarin嘅環境之下能夠用粵語唱咁長時間,真係好難得。好可惜,我哋嘅《月光光》點解要用Mandarin來唱呢?我覺得唱得好難聼,雖然歌詞係改咗。

提到開幕式同閉幕式,仲要提埋嗰個「國家級『監控偷窺閉路電視臺』」(即係「央視」,下文簡稱「偷睇電視臺」)。唔知係導播嘅水平太差定係攝像機嘅位置唔好,個鏡頭唔係太遠就係太近,角度亦不夠多,開幕式、閉幕式都係噉。調返轉睇下,平時亞運體育賽事嘅鏡頭切換、位置、距離、角度反而做得幾好。如果話體育賽事同文藝表演不同,噉廣州電視臺後來播放咗一個廣州話版嘅亞運閉幕式,鏡頭同「偷睇電視臺」好多都唔同,兼且鏡頭位置、距離、角度都拍攝得好過「偷睇電視臺」。上次奧運開幕式同閉幕式嗰陣時,「偷睇電視臺」已經畀人閙過N次,今次亞運居然仲唔吸取教訓,無鬼用。

講到開幕式同閉幕式,又要提下煙花表演。開幕式結束嗰陣時,現場宣佈開幕式結束,本來跟着就有連續20分鐘嘅煙花表演,點知「偷睇電視臺」唔再轉播,令我祗能夠喺屋企陽臺望着會場嗰邊煙花嘅一啲啲火花,然後聽到一陣狂響,真係無奈。到咗閉幕式嘅時候本來以爲「偷睇電視臺」會吸取教訓,繼續轉播埋落去,點知佢一樣唔理,現場宣佈閉幕式結束,跟着就唔再轉播,令到後邊嘅5分鐘煙花表演又再無得睇,又再祗能夠喺陽臺睇下零星少少煙花,然後聼著一片狂響。

除咗呢啲,喺開幕式裏邊我仲有好多好多覺得唔多妥嘅地方,特別係開幕式嗰陣時我哋嘅市長竟然畀亂出風頭嘅人頂替,好彩最後閉幕式因爲禮節需要,市長卒之都出現咗。加埋「偷睇電視臺」嘅種種粗劣拍攝,我當時真係好想成個亞運開幕式閉幕式嘅Mandarin語音部份全部用粵語算數。廣州舉辦亞運仲要畀「偷睇電視臺」搶走攝影轉播權,直頭係無譜。